Gagauziya için M. Çakir adına okumaklar
Katılmak büük hem önemni olaya!
Yaşasın GAGAUZ dilimiz! Yaşasın halkımız!
Gagauziya için M. Çakir adına okumaklar pek önemni da gagauz halkının zamandaş istoriyasında onnarın geçirilmesi sayılȇr artık ii bir adet. Hep bu uurda geçti M. Çakir adına XI-nci Genel Üüretim Ortodoks (Doorusaltanatlı) okumakları da. Oluşmuş kanonnara görä M. Çakir adına okumaklar geçerlär aydınnadıcının duuma gününä karşı iki yılda bir kerä avtonomiyanın temel kultura-administrativ merkezlerin birindä sıravardır. Bu yıl M. Çakir adına Genel Üüretim Ortodoks (Doorusaltanatlı) okumaklar geçtilär Çadır-Lunga muniţipiyindä.
Aprilin 29-nda 2025 yılda Çadır-Lunga mun. Ay Dimitri adına manastırda M. Çakir adına okumaklara toplandı hepsi din adamnarı, bilimcilär, üüredicilär, cümnä, kultura zaametçileri hem avtonomiya önderliin temsilcileri. Forumun işinä katıldı millet hem halklararası cümnenin temsilcileri – gagauzologiya uurunda anılmış bilimcilär hem aaraştırmacılar.
Bilim-kultura forumun musaafirlerinä hem katılımcılarına popaz nasaatınnan hem selemnemäk sözünnän danıştı klisä önderleri hem avtonomiya önderliin temsilcileri.
M. Çakir adına XI-nci Genel Üüretim Ortodoks (Doorusaltanatlı) okumakların pay alannarına teklif edildi çok doklad. Bakıldı en önemni soruşlar gumanitar uurunda, angıların yardımınnan geçecek gagauz halkının gelişmesi hem millet kuruluşu: gagauz cümnenin may hepsi yaşamak sferalarını kaplayan soruşlar, angıları lääzım en kısa vakıtta çözülsün. Yapıldı analiz zamandaş cümnedä ruh-moral terbietmenin problemalarına nicä Gagauziya (Gagauz Eri) ATB-dä, ölä bütün dünnedä dä; hem dä gagauz halkının kultura mirasını korumaa hem zeedeletmää soruşlara.
M. Çakir adına XI-nci Genel Üüretim Ortodoks (Doorusaltanatlı) okumaklar geçtilär üüsek uurda. Musaafirlär hem katılımcılar nışannadılar onnarın soţial-kultura önemini, belli edip, ani butakım sıraların geçirilmesi pek önemni avtonomiyanın gelişmesi için hem gelän boyların terbietmesi için patriotlukta, dedelerin adetlerini hem kendi köklerini korumakta.
