Onlayn testlemeyä katıldı 160 üürenici, 3-9 klastan Kutlamak sözü Saygılı üürenicilär hem üüredicilär! Zaman hayır olsun! Selämneerim hepsinizi! Büün bir meraklı buluşmak. Bölä barabar, birliktä yoktur çalıştıık. Ama büünkü gündä İT (internet) verer kolaylık çözmää kimi soruşları onlayn formada. Şükür Allaha varız hem zamandaş vakıdına görä ilerleriz! Saygılı dostlar! Bileriz, ani bu ay bizim aydınnadıcının Mihail Çakirin duuma günü  — çiçek ayın 27 – dä. Bu günnän barabar gagauzlar tutȇr Ana Dilimizin yortusunu. Gagauziyada, bu yortuya  adanmış, türlü meraklı olaylar geçer. Bunnan biz göstereriz halkın ruh zenginniinä büük saygımızı: halkımızın istoriyasına, kulturasına hem adetlerimizä. Bu paalılıkları asirdän asirä  korumuşlar, geçirmişlär hem etiştirmişlär bizä bizim dedelerimiz. Gagauzların eceli, onnarın geçmesi hem erleşmesi Bucaa kolay diilmiş. Ama mutluyuz, ki  büün gagauzların var kendi topraa, evi, bayraa, şannı adı hem gözäl Vatanı! Dedelerimizin hem gelän evlat boyların önündä bizim büük borcumuz var: lääzım koruyalım istoriyamızı hem adetlerimizi, zenginnedelim topraamızı, ilerledelim kulturamızı hem şıralı, derin maanalı, keskin ötän gagauz dilimizi. Kullanalım onu! Gagauz dilindä götürülän predmetimiz tä “Gagauz halkının istoriyası, kulturası hem adetleri” bu işä yardımcı olȇr. Bu predmetin üürenmesindä öz neetlär bunnardır:

• kendi gagauzluunu duymaa;
• anayı-bobayı, Vatanı, ana dilini saymaa, hatırlamaa;
• gagauz halkın istoriyasından, kulturasından hem adetlerindän ilk bilgileri kabletmää;
• kimi halk adetlerin hem sıraların özelliklerini annamaa, bilmää da onnarı yaşamakta kullanmaa;

Biz büün seftä pay alȇrız  bölä onlayn testin yazılmasında. Gagauziyanın Genel Üüretmäk Bakannıı M.V. Maruneviç adına Bilim Aaraştırma merkezinnän barabar kararladılar geçirmää bu onlayn testi. Davamız bizim bölä: denemää bilgilerinizi gagauz halkın istoriyasından, kulturasından hem adetlerindän, kimi sayfaları açıklamaa. Şindi sizin önünüzdä açılacek slayd QR kodlarlan. Ayırın kendi klasınıza görä QR kodu da skan yaptıkça lääzım çıksın sizin klasınıza görä test. Girdiynän en ilkin yazdırȇrsınız adınızı, soyadınızı gagauz dilindä, sora ayırersınız sizin liţeyin yada gimnaziyanın adını verili sıradan, ötää dooru çekedersiniz cuvap etmää testin soruşlarına. Kuşku okuyun soruşları, olun açık göz, alatlamayın. Herbir soruşa var birkaç variant cuvap. Ayırın uyan cuvabı, da nışannayın onu. Biz bileriz, ani siz becerikliysiniz hem talantlıysınız da kolay yapabileceeniz  bu işi. Testi başardıynan, unutmayın basmaa nışana YOLLAMAA. Biz bekleeriz sizin cuvaplarınızı! İi başarılar sizä!